Wixii war ah xafiiska UK waxaad kala xidhiidhi kartaan: 

Baarlamaanku ha ansixiyo Odoroska Miisaaniyadda 2006

18 Mar. 2005

Dawladda Somaliland iyadoo gudanaysa waajibaadkeeda Dastuuriga ah ayey 1/2/06 Baarlamaankii la soo doortay u gudbisay Odoroska Miisaaniyadda 2006. Wasiirka Maaliayadda Somaliland mudane Xuseen Cali Ducaale(Cawil) ayaa maalintii uu u gudbinayey Miisaaniyadda u jeediyey Mudanayaasha Golaha Baarlamaanka qudbad dheer oo uu uga xogwaramayo xaaladda  guud ee dalka gaar ahaan dhinaca dhaqaalaha iyo duruufaha xadaynaya ama hortaagan oo aad u fara badan. Mudane Cawil wuxuu qudbaddiisa si faahfaahsan ugu caddeeyey in adduun weynuhu denbi ka galay Shacbiga Somaliland oo dawladaha Caalamka, Jimciyadda quruumaha ka dhexaysa iyo haydaha kale ee calamiga ahiba cadaalad darro iyo cunaqabatayn dhinaca siyaadda iyo dhaqaalaha ku hayaan Xukuumadda Somaliland, marka laga reebo wax yar oo fara guudkood ah oo ay hayadaha samafalku ku taakuleeyaan wasaaradaha adeegga bulshada, halka ay taageero siyaaseed, dhaqaale iyo kabitaan miisaaniyadeed oo ku dhow 50% siiyaan wadamo badan oo African ah.

Ujeedadda iyo duurxulka Wasiirku waxay ahayd in mudanayaasha Baarlamaanku fahmaan hawsha, shaqada iyo duruufaha waddanka hortaagan iyo dadaalka wasaaradda Maaliyaddu samaysay si Somaliland u soo gaadho halka ay marayso oo ah in maantaba ay suurto gashay in si nabad ah oo xor iyo xalaal ah lagu soo doorto iyaga oo waliba u badan Axsaabta Mucaaridka ah.

Mudanayaasha Golaha baaralamaanku si wanaagsan oo sharaf leh ayey u dhagaysteen Wasiirka maalintii hore waxaanay u xilsaareen Gudi hoosaadkii ku shaqada lahaa ee dhaqaalaha. Inkasta oo gudi hoosaadku laba jeer dib u dhigeen balan qaadkoodi ahaa inay soo ban dhigayaan talooyinkooda iyo natiijadii ka soo baxday baadhitanaddii ay ku soo sameeyeen ilaha iyo meelaha dakhligu ka soo baxo iwm., haddana gudigaasi sida laga warqabo dhawaan ayey Golaha hor keeneen warbixintoodii waxaanay ka codsadeen Golaha inay Ansixiyaan Miisaaniyadda iyagoo sheegay inay isla garteen Wasiirka Maaliyadda iyo Hayadaha kale ee ay khusayso wixii kordhin iyo wax ka badal kale u baahan sida Mushaharka Shaqaalah Somaliland. Mustaqbalkana  Diyaarinta Miisaaniyadda ka wada shaqayn doonaan diyaarinteeda.

Golaha Baarlamaank Somaliland oo awood u leh inuu ka doodo Miisaaniyadda ayaa guud ahaan mudanayaasha Goluhu ka dib markii ay dhegaysteen warbixintii gudi hoosaadka dhaqaalahu u soo gudbisay ayay dhexgaleen inay ka doodaan oo naaqishaad fara badan ku sameeyeen iyagoo masuuliyiintii wasaaradda maaliyadda u yeedhay si wixii mad madow kaga jiro loogu iftiimiyo.

Inkasta oo ay wanaagsantahay in guud ahaan Golaha Wakiiladu ka qayb qaataan doodad iyo falanqaynta miisaaniyadda si caafimaad qabtana u naaqishaan si loo wanaajiyo habka iyo hanaanka iyo tayada Odoroska Miisaaniyadu una noqoto mid laga soo wada shaqeeyey oo leh faahfaahinta looga baahan yahay dhinacyada  Dakhliga iyo Kharashkaba laguna wada  kalsoon yahay oo guud ahaan Umadda Somaliland Raali galisa, ciddi kale ee u baahanina ku qanci karto.

Waxa nasiib darro ah oo niyad jab ku noqotay dad badan in Mudanayaashii faraha badnaa ee doodda ka qayb qaatay oo ilaa kontameeyo ku dhowaa ay madasha  ka soo ifbaxday in Mudanayaal badan la yimaadeen habdhaqan aan looga fadhiyin iyo su’aalo aan meeshaba qaban oo ay waydiiyeen Wasiirka Maaliyadda Somaliland Mudane Xuseen cali Ducaale oo runtii dadaal dheerad ah iyo wadanninmo muujiyey intii uu xilka hayey. Waxaa wax lala yaabo ah in Mudanayaal badani xadkii ka baxeen oo sulaalo aan loo baahnayn  iyo Siyaasaddii ku jiqsiidii meesha la yimaadeen. Si kastaba ha ahaatee waxaa laga sugayaa Mudanayaasha inay la yimaadaan xilkasnimo dheeraad ah oo muwaadimo ku dheehantay kana koraan caqliyadda aan cidna wanaag u soo jiidayn ee hebel ama xisbi hebel ku jiqsii iyo qaran curyaaminta ah. Ciddina ma diiddana oo waa wixii loo doortay in goluhu ka doodo wixii waajibkiisa ah laakiin iyagana waxaa looga baahan yahay dareen wadaninimo iyo cadaalad iyo inay la shaqeeyaan dawladda sidii ay balan qaadeen.

Ugu dambayntii waxaa haboon in Gudiga loo magacaabay ka soo talinta habaynta doodihii Miisaaniyaddu Cadaaladda iyo Wadaninimada ogaadaan, Golaha baarlamaankuna waa inuu qaataa taladii gudiga dhaqaaluhu u soo jeediyey oo ay Ansixiyaan Odoroska Miisaaniyadda 2006 ay Wasaaradda maaliyaddu soo diyaarisay maadaama  waddank u baahan yahay.

Dad badan ayaa wali is weydiinaya sababta keentay inaan Goluhu ka doodin  ama dadka iyo saxaafadda loo diido markay miisaaniyadooda ay doonayeen in loo kordhiyo iyagoo waliba albaabada u xidhay oo saxaaffaddana ka mabnuucay Shirkii gaarka ahaa ee ay Wasiirka Maaliyadda kaga dalbanayeen kordhinta Miisaaniyadooda  horaantii Jan. 2006.

Ugu dambayntii waxaa u baahan in la xuso in Miisanaiyaddan ay soo diyaarisay Xukuumadda Somaliland taas oo ku can baxday in had iyo jeer iyadoo ka tarjumaysa rabitaanka shacbiga Somaliland hore u dajisay qorshayaasha lagu soo hooyey guulaha is daba jooga ah ee qaranka Somaliland ka gaadhay dhinacyo badan. Tusaale ahaan: dhinaca Xorriyadda, Nabad galyada iyo Doorashooyinka ay ugu dambaysay tii lagu soo doortay Baarlamaankan maanta ka doodaya Miisaniyadda 2006.

Axmed Naasir Xirsi Maxamed

Gudoomiyaha KMG UDUB UK

Bristol. Uk